ටිකක් පළල් කතාබහක් වෙනුවෙන් පදනමක් සපයන කරුණු ටිකකුයි අද සටහන් වෙන්නේ. හැකිතාක් සරලව මෙහිදී සටහන් කරන්න උත්සාහ කරත් කිසියම් ආකාරයකින් සන්නිවේදනය කරන්න උත්සාහ කරන අදහස තේරුම්ගන්න අපහසු වුණා කියලා අපේ ඉදිරි සාකච්ඡාව මගහැරෙන්නේ නැහැ. මේක එක්තරා ප්‍රවේශයක් විතරයි.
හොදයි, කතාව සංස්කෘතිය. හැබැයි වසර දෙදහස් පන්සියයක ඉතිහාසයක් තියෙන ශ්‍රී ලංකාවේ සිංහල බෞද්ධ ශිෂ්ඨාචාරය ගැන නම් නෙවෙයි. මේත් අපේ සංස්කෘතිය තමයි, හැබැයි සංක්‍රමණික ශ්‍රී ලාංකිකයින්ගෙ සංස්කෘතිය ගැන.
සංස්කෘතිය ගැන කියන කාරණා කිහිපයක් පහත දක්වලා තියෙනවා.
- සංස්කෘතිය කියන්නේ ඉතිහාසයක් විසින් සිදුකරන ගොඩනැංවීමක්. ඒක හොදයි හෝ නරකයි කියලා වෙන්කරන්න බැහැ.
- සංස්කෘතිය ඇතුලෙ සාධනීය මෙන්ම නිශේධනීය ලක්ෂන දෙකම ගැබ් වෙලා තියෙනවා.
- නිශ්චිත භුගෝලීය සීමාවක් ඇතුලෙ කාලයක් පුරාවට සිද්ධවෙන නොයෙකුත් සමාජ කියාකාරකම් හේතුවෙන් මහා සංස්කෘතියක් බිහිවෙනවා.
- ඒ තුළ දැනුම, විශ්වාසය, කලා, සදාචාර ධර්‍මයන්, නීතිය, සිරිත හා අනෙකුත් සියළුම හැකියාවන්, පුරුදු වගේම පොඩි පොඩි සීමා මායිම් සහ භෞතික හා අභෞතික ගොඩනැගීම් ඇතුලත් වෙනවා.
මේ කතාව අපි මහා බ්‍රිතාන්‍යයට අදාළ කරල ගත්තොත්. මෙකී සහ නොකී කාරණාවන් ගණනාවක් එක්ක මහා බ්‍රිතාන්‍යයට අනන්‍යවන සංස්කෘතියක් බිහිවෙලා තියෙනවා. ඒක ඒ ආකාරයෙන්ම ලංකාවටත් අදාළයි. විවිධාකාර හේතු හින්දා ශ්‍රී ලාංකිකයෝ බ්‍රිතාන්‍යයට සංක්‍රමණය වෙනවා. එතකොට මේ සංස්කෘතික ද්විත්වයක ඉන්න ජන පිරිස් දෙකක් එකට වාසය කරනවා. එංගලන්තයෙදි ශ්‍රී ලාංකිකයින්ට පෙර බොහෝ සංක්‍රමණික ජන පිරිස් සමග ජීවත්වෙලා තිබුණ රටක්. මෙවැනි තත්ත්වයක් ඇතුලෙ වෙන්න පුළුවන් දේවල් කිහිපයක් තියෙනවා.
- Multiculturalism - බහුසංස්කෘතිකවාදය - මෙතනදි බහුතර, සුළුතර සියළු දෙනාටම තම තමන්ට කැමති ආකාරයේ සංස්කෘතික භාවිතාවක නිරතවිය හැකියි.
- Cultural Assimilation - සංස්කෘතික සමග්‍රහණය - මෙමගින් සිද්ධවන්නේ සංස්කෘතීන් ද්විත්වයක් අතරින් ප්‍රධාන එක විසින් අනෙක් සංස්කෘතිය උරාගනු ලැබීමයි. මෙය බලහත්කාරයෙන් හෝ ස්වභාවයෙන්ම සිදුවිය හැකියි. මැදපෙරදිග රටවලදි මෙය බලහත්කාරයෙන් සිදුවන බව දකින්න පුළුවන්. සංක්‍රමණිකයින්ට අදාළව ගත්කළ දෙවන හෝ තෙවන පරම්පරාවලදි මහා සංස්කෘතියට සමග්‍රහණය වන ආකාරයක් දකින්න පුළුවන්.
- The Melting pot නොහොත් සමජාතීකරණය කියන්නේ සංස්කෘතීන් කිහිපයක් මිශ්‍රවෙලා එක් සංස්කෘතියක් බවට පත්වීම. ඉංග්‍රීසි භාෂාවට ඉන්දියානු, අප්‍රිකානු භාෂාවන්ට අයත් වචන එකතුවී ඉංග්‍රීසි සංස්කෘතිය වෙනස්වීම මේ සංකල්පය තුළින් අදුරගන්න පුළුවන්.
තව තවත් වර්ගීකරණයන් බොහෝමයක් අදුරගන්න පුළුවන් වුණත් සංක්‍රමණික පරම්පරාවල පළමු පිරිස් නියෝජනය කර අය විදිහට පැනනගින ගැටළු මේ සංකල්ප ඇසුරෙන් අදුරගන්න පුළුවන්. දෙමාපිය ඇසුර සහ අධ්‍යාපනය වැනි තීරණාත්මක කාලපරිච්ඡේදයක් එක සංස්කෘතියක් තුළත් ජීවිතේ අනෙක් කාලය ඊට හාත්පසින්ම වෙනස් සංස්කෘතියක් තුළ ජීවත් වීමට සිද්ධවෙලා තිබීම අවසාන වශයෙන් සංස්කෘතික ගැටුමක් බවට පරිවර්තනය වෙන්න බොහෝ ඉඩකඩ වැඩියි.
සැප්තැම්බර් 26 අගෝරා සංස්කෘතික උළෙල කියන්නෙම මේ සංස්කෘතික ගැටුමෙ ප්‍රතිඵලයක් කියලා කවුරුහරි ප්‍රකාශකරනවනම් ඒක අසත්‍යයක් නෙවෙයි. හැබැයි ගැටුමක් කියන්නේ නරක දෙයක් නෙවෙයි, ඒකට දක්වන ප්‍රතිචාරය සාධනීය නම්. ජුලි 11 කලින් මේ විෂය ඇතුලේ යම් කතාබහක් ගොඩනගාගන්න අපි උත්සාහ කරමු.
No comments:
Post a Comment