පොත් කියවනවා කියන එක මිනිස්සුන්ගේ සංස්කෘතික ජීවිතය එක්ක හරිම තදින් බැදිලා තියෙන දෙයක්. පොතත් එක්ක යටිපෙළින් සංස්කෘතියක් තියෙනවා කියන එක අමුතුවෙන් කියන්න ඕන දෙයක් නෙවෙයි.
ලන්ඩන් නුවර පොත් වලට හරිම පොහොසත් තැනක්. ඒක හින්දා ඉංග්‍රීසි වගේම ලෝකේ තියෙන ඕනෑම භාෂාවක පොතක් හොයාගන්න අමාරු තැනක් නෙවෙයි. හැබැයි ලාංකිකයින් විසින් ලියන ලද සිංහල භාෂාවෙන් හෝ දමිළ භාෂාවලින් මුද්‍රිත පොත්පත් හොයාගන්න නිශ්චිත ක්‍රවේදයක් මේ වන විට නැහැ. අන්තර්ජාලයේ ව්‍යාප්තිය වගේම යොදන පිරිවැයිට සාපෙක්ෂ ලාභයක් හොයාගන්න බැරිවීම මුද්‍රිත පොත්පත් ලංකාවෙන් පිටතට නොඑන්න බලපා තිබෙන බව පැහැදිලියි. මෙතෙක් කාලයක් සතිපතා පැමිණි ජාතික පුවත්පත් පවා මේ වන විට එංගලන්තයට රැගෙන ඒම අතහැර දමා තිබෙනවා.
එංගලන්තයේ වෙසෙන ලාංකිකයින් ඉල්ලුම් සැපයුම් න්‍යායට හසුවීමේ පාපය නිසාවෙන් දේශීය පොත්පත් කියැවීමේ අවස්ථාව අහිමි‍වන විට ඉල්ලුම් සැපයුම් න්‍යායට අනුව නොහැසිරෙන, ලාභය උපරිම කිරීමේ වෙළද අරමුණක් රහිත අගෝරා සංස්කෘතික කවය එංගලන්තයට ලාංකික පොත්පත් රැගෙන ඒම ආරම්භ කොට තිබෙනවා. මගහැරයා නොහැකි මූල්‍ය අපහසුතා මධ්‍යයේ වුවත් අවම තරම් මිලකට ඒවා ලන්ඩන් ලාංකිකයින්ට ලබාගැනීමට අවස්ථාව ලැබී තිබෙනවා.
පසුගියදා අවසන් වුණු ලන්ඩන්හි හවුන්ස්ලෝ සහ කින්ස්බරි යන අවුරුදු උත්සව වලදි තෘප්තිමත් විය හැකි ආකර්ශනයක් පොත්වෙනුවෙන් ලැබුණු බව කිවයුතුමයි.
සාහිත්‍ය උළෙලක් දක්වා අගෝරා ගමන් කරන්නේ මෙවැනි පියවර තබමින්. සැප්තැම්බර් 26 දවසම ඒ වෙනුවෙන් වෙන්කරාට පසුතැවීමක් නොවෙන්න මේ අත්දැකීම් හේතුවෙන බව අපිට ලොකු විශ්වාසයක් තියෙනවා.
No comments:
Post a Comment